हिंजवडीतील वाहतूक कोंडीने आयटी कर्मचाऱ्यांचा त्रास वाढला; ‘वर्क फ्रॉम होम’ची मागणी तीव्र

पुणे : पावसाळा सुरू होताच हिंजवडीतील वाहतूक कोंडीचा प्रश्न पुन्हा एकदा गंभीर बनला आहे. खराब रस्ते, साचलेले पाणी आणि नियोजनशून्य वाहतूक व्यवस्थेमुळे आयटी कर्मचाऱ्यांना तासन्‌तास कोंडीत अडकावे लागत आहे. परिणामी, अनेक आयटी कंपन्यांमध्ये कार्यरत असलेले कर्मचारी सध्या ‘वर्क फ्रॉम होम’ची मुभा द्यावी, अशी सातत्याने मागणी करत आहेत.

पावसात रस्त्यांवरच अडकतो दिवस

हिंजवडी परिसरातील रस्त्यांची अवस्था अत्यंत दयनीय झाली असून, ठिकठिकाणी खड्डे आणि पाण्याचे साठे निर्माण होत आहेत. अशा परिस्थितीत हजारो वाहनं रस्त्यावर येत असल्याने प्रचंड वाहतूक कोंडी निर्माण होते. त्यामुळे आयटी कर्मचाऱ्यांचे मानसिक आणि शारीरिक आरोग्यही धोक्यात येत आहे. वाहतूक कोंडीमुळे कार्यालय गाठण्यासाठी आणि घरी पोहोचण्यासाठी लागणारा वेळ लक्षणीय वाढला आहे.

कंपन्यांकडून संमिश्र धोरण

कोरोनानंतर काही काळ वर्क फ्रॉम होमचा पर्याय सर्वमान्य झाला होता. मात्र सध्या अनेक आयटी कंपन्यांनी पुन्हा पाच दिवस कार्यालयात येण्याचे आदेश लागू केले आहेत. काही कंपन्यांनी 'हायब्रीड' म्हणजे आठवड्यातून दोन-तीन दिवस ऑफिस आणि उर्वरित दिवस घरून काम करण्याचा पर्याय दिला असला तरीही कर्मचाऱ्यांना वाहतुकीची झळ सोसावीच लागत आहे.

कर्मचारी संघटनांची भूमिका

‘फोरम फॉर आयटी एम्प्लॉईज’ या संघटनेने सरकार आणि कंपन्यांकडे मागणी केली आहे की, पावसाळ्यात तरी 'वर्क फ्रॉम होम' पर्याय द्यावा, जेणेकरून वाहतुकीचा भार कमी होईल, अपघात व अडथळ्यांचं प्रमाण कमी होईल, आणि कर्मचाऱ्यांचा वेळ वाचेल.

'हिंजवडी अनक्लॉग' मोहीमेस लोकप्रतिनिधींचा पाठिंबा

हिंजवडीला पिंपरी-चिंचवड महापालिकेत समाविष्ट करण्याची मागणी करणाऱ्या 'Unclog Hinjawadi' या ऑनलाईन मोहिमेला लोकप्रतिनिधींचा पाठिंबा मिळाला आहे. आमदार महेश लांडगे आणि आमदार शंकर जगताप यांनी त्यांच्या एक्स हॅंडलवरून या मागणीला पाठिंबा दिला असून, पायाभूत सुविधांवर तातडीने काम होणे गरजेचे असल्याचे मत व्यक्त केले आहे.

पुढचे पाऊल...

या मागणीला आता २० हजारांहून अधिक नागरिकांचा पाठिंबा मिळाला असून, लवकरच सह्यांचे अर्ज घेऊन मुख्यमंत्र्यांकडे निवेदन सादर करण्यात येणार आहे, अशी माहिती याचिकाकर्ते सचिन लोंढे यांनी दिली आहे.

दरम्यान, हिंजवडीतील आयटी कर्मचाऱ्यांची स्थिती दिवसेंदिवस बिकट होत चालली असून, वर्क फ्रॉम होम हा केवळ सोईचा नव्हे, तर सुरक्षिततेचा पर्याय ठरू शकतो. यासाठी शासन आणि कंपन्यांनी तातडीने सकारात्मक भूमिका घ्यावी, अशी अपेक्षा सर्वच आयटीयन्स व्यक्त करत आहेत.