सिंहगड रस्त्यावरील तिसऱ्या टप्प्यातील उड्डाणपूल पावसामुळे अजून महिनाभर रखडणार; ‘बॉटलनेक’चा धोकाही कायम

पुणे: सिंहगड रस्त्यावरील वाहतूक कोंडी कमी करण्यासाठी उभारण्यात आलेल्या माणिकबाग ते हिंगणे दरम्यानच्या तिसऱ्या टप्प्यातील उड्डाणपुलाचे उद्घाटन आणखी महिनाभर लांबले आहे. १५ जून रोजी पुल सुरू करण्याचे महापालिकेचे नियोजन होते, मात्र मे-जून महिन्यांतील जोरदार पावसामुळे काम रखडले आहे. आता जुलै अखेरपर्यंत पुलाचे काम पूर्ण होण्याची शक्यता असल्याची माहिती महापालिकेच्या प्रकल्प विभागाने दिली आहे.

जोरदार पावसाने काम उधळले

प्रमुख अभियंता युवराज देशमुख यांनी सांगितले की, “रॅम्पच्या कामात वापरण्यात आलेला मुरूम पावसामुळे चिखलात रूपांतरित झाला. त्यामुळे पुढील काम थांबवावे लागले. डांबरीकरणही पावसामुळे करता आले नाही. आता हवामान सुधारल्यास काम वेगाने पूर्ण होईल.”

उड्डाणपूल – तीन टप्प्यांतील प्रगती

पहिला टप्पा: राजाराम पुल चौक – उद्घाटन : २६ जानेवारी २०२५

दुसरा टप्पा: विठ्ठलवाडी कमान ते फनटाईम थिएटर – उद्घाटन : १ मे २०२५

तिसरा टप्पा: माणिकबाग ते हिंगणे – काम अपूर्ण, उद्घाटन रखडले

‘बॉटलनेक’चा धोका कायम

उड्डाणपुलाचे काम पूर्ण झाल्यानंतरदेखील हिंगणे येथे पुलाखाली असलेल्या अरुंद सेवा रस्त्यामुळे वाहतूक कोंडी कायम राहण्याची शक्यता आहे. पेट्रोल पंपाजवळ सीएनजी भरणाऱ्या वाहनांच्या रांगा रस्त्यावर लागत असल्याने, वाहनांची गर्दी संतोष हॉल पर्यंत पोहोचते. या ठिकाणी झाडामुळे आणि अरुंद रस्त्यामुळे ‘बॉटलनेक’ निर्माण झाला आहे.

अपघाताचा संभाव्य धोका

उड्डाणपुलावरून येणारी वाहने डावीकडे वळून थेट पेट्रोल पंपावर जात असल्यास, अपघात होण्याची शक्यता आहे. त्यामुळे वाहतूक अधिकाऱ्यांकडे सुरक्षित व वाहतूक सुरळीत होण्यासाठी नियोजनात्मक हस्तक्षेपाची मागणी होत आहे.

अनुत्तरित प्रश्न 

हे बॉटलनेक कसे दूर केले जाणार?

पेट्रोल पंपाच्या जागेचे पुनर्रचना होणार का?

वाहतूक पोलिसांची भूमिका काय?

दरम्यान, सिंहगड रस्त्यावरील तिसऱ्या टप्प्याचे उड्डाणपुलाचे काम पावसामुळे रखडल्याने नागरिकांना अजून काही काळ वाहतूक कोंडीचा सामना करावा लागणार आहे. या पुलाचे काम पूर्ण होण्यास वेळ लागणार असतानाच, उद्घाटनानंतरही सेवा रस्त्यावरील बॉटलनेक ही वाहतुकीस मोठी अडचण ठरणार आहे. त्यामुळे महापालिका आणि वाहतूक पोलिसांनी हे आव्हान प्राधान्याने हाताळणे आवश्यक ठरणार आहे.