तुकाईनगर भागात सिमेंट मिक्सरच्या धडकेत २० वर्षीय मुलीचा मृत्यू, परिसरात हळहळ

पुणे: सिंहगड रस्त्यावरील हिंगणे तुकाईनगर भागातील गणेश कॉलनी येथे सांडपाणी व चिखलामुळे घसरलेल्या दुचाकीला सिमेंट मिक्सर ट्रकने धडक दिल्याने २० वर्षीय युवतीचा दुर्दैवी मृत्यू झाला. मृत मुलीचे नाव सई भागवत आहे. या दुर्दैवी घटनेमुळे परिसरात हळहळ व्यक्त केली जात आहे.

दुर्घटनेची माहिती

सई भागवत ही सिंहगड महाविद्यालय, वडगाव येथे शिक्षणासाठी जात असताना ही दुर्घटना घडली. हिंगणे येथून सिंहगड कॉलेजकडे जात असताना, तिची दुचाकी आणि सिमेंट मिक्सर ट्रक एकाच दिशेने जात होते. मात्र, रस्त्यावर मोठ्या प्रमाणात सांडपाणी व चिखल साचल्यामुळे सईने तो टाळण्याचा प्रयत्न केला. त्याच वेळी ट्रकने तिच्या दुचाकीला धडक दिली आणि ती ट्रकच्या चाकाखाली आली. यामध्ये तिचा जागीच मृत्यू झाला.

अपुऱ्या नागरी सुविधांचा बळी

या रस्त्यावर गेल्या अनेक महिन्यांपासून सांडपाणी वाहत असून, रस्ता सतत चिखलयुक्त आणि धोकादायक बनला आहे. स्थानिक नागरिकांनी वेळोवेळी तक्रारी करूनही याकडे दुर्लक्ष झाल्याचे निदर्शनास आले आहे. अपुऱ्या पायाभूत सुविधांमुळे निष्पाप जीव गमवावा लागल्याने परिसरात हळहळ व्यक्त होत आहे.

पोलीस तपास सुरू

या प्रकरणी सिंहगड पोलीस ठाण्याचे वरिष्ठ पोलीस निरीक्षक दिलीप दाइंगडे यांच्या मार्गदर्शनाखाली सहाय्यक पोलीस निरीक्षक समीर कदम तपास करत आहेत. ट्रक चालकाविरुद्ध कायदेशीर कारवाई सुरू करण्यात आली असून, अधिक तपास सुरू आहे.