पुणे मेट्रोचा नवा विक्रम, गणपती विसर्जनादिवशी एकाच दिवसात साडेतीन लाख प्रवाशांची मेट्रो सफर

पुणे: पुणे शहरात सार्वजनिक वाहतूक व्यवस्थेच्या संदर्भात एक वर्षापूर्वीपर्यंत पीएमपीएमएल हा प्रमुख आधार होता. मात्र, मागील वर्षी पंतप्रधान नरेंद्र मोदी यांच्या हस्ते पुण्यातील दोन महत्त्वाच्या मार्गांवर मेट्रोची सेवा सुरू करण्यात आली, आणि त्यानंतर पुणेकरांसाठी वाहतुकीचा एक नवीन पर्याय उपलब्ध झाला. सततच्या वाहतूक कोंडीमुळे त्रस्त असलेल्या पुणेकरांना मेट्रोने सुटकेचा मार्ग दिला आहे, ज्यामुळे मेट्रो सेवा शहरात लोकप्रिय होऊ लागली आहे.गणेशोत्सवाच्या निमित्ताने पुण्यातील सार्वजनिक वाहतुकीत मेट्रोने महत्त्वाची भूमिका बजावली आहे. 

अनंत चतुर्दशीच्या दिवशी पुणे मेट्रोने नवा विक्रम रचला, ज्यामुळे शहरातील वाहतूक व्यवस्थेत मेट्रोचा वाढता महत्त्व अधोरेखित झाला. लाडक्या गणरायाला निरोप देण्यासाठी लाखो पुणेकरांनी विसर्जन मिरवणुकीत सहभाग घेतला, त्यावेळी मेट्रोने पुणेकरांसाठी प्रवासाचा सोयीस्कर पर्याय उपलब्ध करून दिला.  

गणेश विसर्जनाच्या मंगळवारी, पुणे मेट्रोतून तब्बल ३ लाख ४६ हजार ६३३ प्रवाशांनी प्रवास केला, ज्यामुळे मेट्रोने एका दिवसातील सर्वाधिक प्रवासी वाहतुकीचा विक्रम मोडला. याच प्रवासातून मेट्रोलाही भरघोस आर्थिक लाभ झाला. एकाच दिवसात पुणे मेट्रोला ५४ लाख ९२ हजार ४१२ रुपयांचे उत्पन्न मिळाले, हे मेट्रोच्या लोकप्रियतेची आणि पुणेकरांचा मेट्रोवरील भरोसा दिसून येत आहे.