"बोटीच्या टोकावर उभा राहून जिंकली जगाची मने, रेयानच्या स्टाईलला इंटरनेटचा सलाम!" ऑरा फार्मिंग'ने इंटरनेटचा वेगच बदलला

आजच्या डिजिटल युगात एखाद्या साध्या व्हिडिओमधून कोणीही रातोरात जगभर प्रसिद्ध होऊ शकतो. काही वेळा या प्रसिद्धीमागे केवळ नृत्य, आत्मविश्वास, किंवा विचित्र हावभाव यापलीकडे काहीही नसते. अगदी तसाच अनुभव सध्या इंडोनेशियाच्या रियाऊ प्रांतातील ११ वर्षीय रेयान अर्खान दिखा या मुलाने घेतला आहे. या छोट्या मुलाच्या एका साध्यासुध्या व्हिडिओमुळे ‘ऑरा फार्मिंग’ हा शब्द जागतिक ट्रेंड ठरला आहे. या घटनाक्रमाने इंटरनेट संस्कृती, स्थानिक परंपरा आणि आत्मविश्वास यांचा सुरेख संगम साधला आहे.

‘तो’ मुलगा नेमका कोण?

रेयान अर्खान दिखा हा रियाऊ प्रांतातील एका छोट्या गावातील मुलगा आहे. पाकू जलूर (Pacu Jalur) या स्थानिक पारंपरिक बोट शर्यतीत तो भाग घेत होता. या स्पर्धेत लांबट, अरुंद बोटींमध्ये शेकडो खेळाडू स्पर्धा करतात. या शर्यतीचे वैशिष्ट्य म्हणजे बोटीच्या टोकावर असलेला ‘तोगाक लुआन’ नावाचा नर्तक. त्याचे काम म्हणजे आपल्या देहबोलीतून, चेहऱ्यावरील हावभावातून बोटीच्या रोअरर्सना उत्साह देणे, त्यांच्या मनोबलात ऊर्जा भरणे. रेयानने ही भूमिका अत्यंत आत्मविश्वासाने पार पाडली. काळ्या पारंपरिक पोशाखात, डार्क सनग्लासेस घालून आणि कमालीच्या सहजतेने बोटीच्या टोकावर उभा राहून त्याने केलेले हे हावभाव, स्टाईल आणि नृत्य इंटरनेटवर वाऱ्यासारखे पसरले.   

काळ्या पारंपरिक पोशाखात, डार्क सनग्लासेस घालून, संपूर्ण आत्मविश्वासाने, चेहऱ्यावर कोणताही संकोच न ठेवता, तो बोटीच्या टोकावर नाचत होता. त्याच्या त्या प्रत्येक हालचालीतून एक वेगळाच आत्मविश्वास जाणवत होता. त्याच्या त्या अंदाजात, स्टाईलमध्ये आणि ठाम व्यक्तिमत्त्वात एक निखळ सहजता होती. इंटरनेटला नेमकं हेच हवं होतं. हा व्हिडिओ सोशल मीडियावर अपलोड होताच काही क्षणांत तो लाखो लोकांपर्यंत पोहोचला. ट्विटर, इंस्टाग्राम, यूट्यूब, फेसबुक या सर्व प्लॅटफॉर्मवर तो ट्रेंड होऊ लागला. लोकांनी त्याला ‘The Ultimate Aura Farmer’ ही उपाधी दिली. या उपाधीमागचं कारणही तितकंच मजेशीर आणि अर्थपूर्ण आहे.

व्हायरल होण्यामागचे कारण

रेयानचा हा व्हिडिओ प्रथम इंडोनेशियन सोशल मीडियावर ट्रेंड झाला. त्यानंतर ट्विटर (X), इंस्टाग्राम, फेसबुक, यूट्यूब या जागतिक प्लॅटफॉर्मवर या मुलाला ‘The Ultimate Aura Farmer’ असे उपनाव मिळाले. लोकांनी त्याच्या आत्मविश्वासाने भारावून जाऊन, या प्रकाराला ‘Aura Farming’ असे संबोधले. एका साध्या व्हिडिओने तो केवळ एक कलाकार न राहता जगभर चर्चेचा विषय ठरला.

‘ऑरा फार्मिंग’ म्हणजे नेमकं काय?

सुरुवातीला हा शब्द थट्टेखातर वापरण्यात आला. पण इंटरनेटच्या भाषेत त्याला एक वेगळीच प्रतिष्ठा लाभली. ‘Aura’ म्हणजे व्यक्तीभोवती निर्माण होणारी सकारात्मक, आकर्षक ऊर्जा. ‘Farming’ म्हणजे ती ऊर्जा पेरणे, वाढवणे, पसरवणे.म्हणजेच, ‘Aura Farming’ म्हणजे कोणत्याही परिस्थितीत प्रचंड आत्मविश्वासाने, शैलीने, आणि सकारात्मक भावनेने वावरणे. त्या वर्तनातून इतरांवर प्रभाव टाकणे. आज सोशल मीडियावर हा शब्द वापरला जातो तेव्हा त्याचा अर्थ असा होतो :मी आत्मविश्वासाने भरलेलो आहे. माझ्या Energy ने इतरांना Positive Vibe मिळतो. Style आणि Attitude ही माझी ओळख आहे.

‘पाकू जलूर’ : एका परंपरेची जागतिक ओळख

रेयानचा हा व्हिडिओ फक्त मनोरंजनापुरता मर्यादित राहिला नाही. यामागे इंडोनेशियाची शेकडो वर्षांची सांस्कृतिक परंपरा आहे. ‘Pacu Jalur’ हा रियाऊ प्रांतातील पारंपरिक जलक्रीडा प्रकार आहे. १७व्या शतकापासून या स्पर्धेचे आयोजन केले जाते. सुरुवातीला ही शर्यत केवळ स्थानिक उत्सवांचा भाग होती. मात्र, २०१५ पासून याला इंडोनेशियाच्या ‘अमूर्त सांस्कृतिक वारसा’ (Intangible Cultural Heritage) म्हणून मान्यता मिळाली आहे. दर ऑगस्टमध्ये इंडोनेशियन स्वातंत्र्य दिनाच्या निमित्ताने या स्पर्धा रंगतात.रेयानसारखे ‘तोगाक लुआन’ हे या शर्यतीचे आकर्षण असतात. ते बोटीच्या टोकावर उभे राहून आपल्या अभिनय, नृत्य, हावभावांमधून बोटीला ऊर्जा देतात.

या व्हिडिओमुळे पुढे काय घडलं?

या छोट्या मुलाच्या व्हिडिओने फक्त सोशल मीडिया जिंकले नाही तर इंडोनेशियन पर्यटन मंत्रालयाचेही लक्ष वेधले. रेयान अर्खान दिखाला रियाऊ प्रांताचा ‘पर्यटन राजदूत’ (Tourism Ambassador) म्हणून अधिकृत नियुक्ती देण्यात आली आहे. स्थानिक संस्कृती, परंपरा, आणि कलेला जागतिक स्तरावर ओळख मिळवून देण्यात त्याचा मोठा वाटा आहे, असे म्हणत ही सन्मानाची निवड करण्यात आली.

रेयान अर्खान दिखाने कोणताही प्रयत्न करून प्रसिद्धी मिळवलेली नाही. तो फक्त आपल्या कामात प्रामाणिक होता, आत्मविश्वासपूर्ण होता. त्याच्या त्या सहज आत्मविश्वासाने आज जगभरच्या लोकांना नवीन शब्द दिला — ‘ऑरा फार्मिंग.’

एका छोट्या मुलाच्या बोटीवरच्या नृत्यामुळे एक नवीन जागतिक शब्दप्रयोग ‘ऑरा फार्मिंग’ उदयास आला. आत्मविश्वास, सकारात्मकता, आणि व्यक्तिमत्त्वाची ताकद किती प्रभावी असते, हे या घटनेने दाखवून दिले. आज जगभरातील तरुण सोशल मीडियावर ‘ऑरा फार्मिंग’ करताना दिसत आहेत. मात्र रेयान अर्खान दिखा याने दाखवून दिले, की आत्मभान असले की कुठलीही छोटी गोष्ट जगभर पोहचू शकते — अगदी एका लहानशा बोटीच्या टोकावरूनसुद्धा.