जळगावात ज्यूदोचा जल्लोष! पुनीत बालन ग्रुप प्रस्तुत ५२ वी राज्यस्तरीय ज्युनियर ज्यूदो स्पर्धेला शानदार सुरुवात

जळगाव, दि. १ नोव्हेंबर : पुनीत बालन ग्रुप प्रस्तुत ५२ वी राज्यस्तरीय ज्युनियर ज्यूदो क्रीडा स्पर्धा महाराष्ट्र ज्यूदो संघटना आणि जळगाव जिल्हा ज्यूदो हौशी असोसिएशन यांच्या संयुक्त विद्यमाने श्री छत्रपती शिवाजी महाराज जिल्हा क्रीडा संकुल, जळगाव येथे अत्यंत उत्साहात सुरू झाली आहे. या स्पर्धेत राज्यातील ३० जिल्ह्यांतील सुमारे ३५० खेळाडू तसेच ८० प्रशिक्षक, संघव्यवस्थापक आणि पंच सहभागी झाले असून, राज्यभरातून आलेल्या या खेळाडूंनी जळगावच्या भूमीत ज्यूदोचा रंग भरला आहे.

राज्यभरातील खेळाडूंचा उत्साह; पहिल्या दिवसाचे सामने थरारक

पहिल्या दिवशी विविध वयोगटातील सामन्यांमध्ये खेळाडूंनी अप्रतिम चपळता, संतुलन आणि तांत्रिक कौशल्य दाखवले. महिला आणि पुरुष गटांमधील काही सामने अत्यंत चुरशीचे ठरले. जळगाव जिल्ह्यातील खेळाडूंनी देखील राज्यस्तरीय पातळीवर आपली उपस्थिती ठळकपणे जाणवून दिली.

महाराष्ट्र ज्यूदो असोसिएशनचे अध्यक्ष शैलेश टिळक यांनी सांगितले की, “जळगावमध्ये प्रथमच अशा दर्जाची राज्यस्तरीय ज्यूदो स्पर्धा आयोजित होत आहे. या माध्यमातून जिल्ह्यातील युवकांना राज्य पातळीवर स्पर्धा करण्याची आणि स्वतःला सिद्ध करण्याची अमूल्य संधी मिळाली आहे.” जळगाव जिल्हा ज्यूदो असोसिएशनचे अध्यक्ष विष्णू भंगाळे यांनीही या स्पर्धेत सहभागी सर्व खेळाडू आणि संघांचे स्वागत करताना सांगितले की, “या स्पर्धेमुळे जिल्ह्यातील खेळ संस्कृतीला नवे बळ मिळेल. आमचा प्रयत्न जळगावला राज्याच्या क्रीडा नकाशावर ठळक स्थान मिळवून देण्याचा आहे.”

उद्घाटन सोहळ्यात मान्यवरांची उपस्थिती

स्पर्धेचे भव्य उद्घाटन आमदार राजू मामा भोळे यांच्या हस्ते करण्यात आले. याप्रसंगी महाराष्ट्र ज्यूदो असोसिएशनचे अध्यक्ष शैलेश टिळक, सचिव दत्ता आफळे, खजिनदार रवींद्र मेटकर, जैन इरिगेशनचे वरिष्ठ अधिकारी रवींद्र धर्माधिकारी, पारोळा नगरपरिषदेचे मुख्याधिकारी किशोर चव्हाण, संचालक अनिल देशमुख, गणेश शेटकर, आंतरराष्ट्रीय पंच विजय यादव, टूर्नामेंट डायरेक्टर अमोल देसाई, राज्य सॉफ्टबॉल संघटनेचे सचिव व शिवछत्रपती पुरस्कार विजेते प्रदीप तळवेलकर, तांत्रिक सदस्य अतुल बामनोदकर, सचिन देवळे, वृषाली लेग्रस, उपाध्यक्ष ऍड. विकास पाटील, तसेच तांत्रिक समिती अध्यक्षा दर्शना लखानी आदी मान्यवर उपस्थित होते. या उद्घाटन समारंभाचे संयोजन श्रीमती ज्योती पाटील आणि महेश पाटील यांनी उत्तमरीत्या पार पाडले. उपस्थित पाहुण्यांनी जळगावमध्ये ज्यूदो स्पर्धा आयोजित केल्याबद्दल जिल्हा ज्यूदो असोसिएशनचे अभिनंदन केले.

आयोजन समितीचे परिश्रम आणि सहकार्य

स्पर्धेच्या यशस्वी आयोजनासाठी सचिव डॉ. उमेश पाटील, योगेश महाजन, अतुल गोरडे, अजय काशीद, डिंगबर महाजन, सचिन वाघ, डॉ. चांद खान, अशफाक शेख आणि इतर पदाधिकारी अत्यंत मेहनत घेत आहेत. खेळाडूंसाठी निवास, भोजन, वैद्यकीय सुविधा, तांत्रिक सहाय्य आणि सुरक्षेची काटेकोर व्यवस्था करण्यात आली आहे. मैदानाची सजावट, पंच कमिटीची अचूक तयारी आणि स्पर्धेचे डिजिटल स्कोअरिंग या सर्व बाबींनी आयोजनाची पातळी उंचावली आहे.

समारोप सोहळा भव्य होणार

स्पर्धेचा समारोप दि. २ नोव्हेंबर रोजी सायंकाळी भव्य समारंभाने होणार असून, या प्रसंगी राज्याचे पाणीपुरवठा व स्वच्छता मंत्री तथा जिल्ह्याचे पालकमंत्री ना. गुलाबराव पाटील, राज्यसभेचे नवनिर्वाचित खासदार आणि प्रसिद्ध वकील उज्ज्वल निकम, तसेच खासदार स्मिताताई वाघ यांच्यासह अनेक मान्यवर उपस्थित राहणार आहेत. विजेत्या खेळाडूंना या वेळी सन्मानचिन्हे व पारितोषिके देण्यात येणार आहेत.

जळगावमध्ये ज्यूदो खेळाचा नवा अध्याय

या राज्यस्तरीय स्पर्धेमुळे उत्तर महाराष्ट्रातील जळगाव जिल्ह्यात ज्यूदो खेळाचा विकास आणि प्रसार होण्यास मोठी चालना मिळाली आहे. स्थानिक तरुणांमध्ये आत्मविश्वास, शिस्त आणि क्रीडावृत्ती वाढविण्यासाठी ही स्पर्धा प्रभावी ठरत आहे. ज्यूदो हा फक्त खेळ नसून “संयम, आत्मनियंत्रण आणि प्रामाणिकतेचा जीवनमंत्र” आहे — आणि जळगावमध्ये आयोजित या स्पर्धेने तो संदेश प्रभावीपणे दिला आहे.