खडकवासला धरणालगत असलेल्या जलसंपदा विभागाच्या रिकाम्या जागेत पर्यटन केंद्राचा विकास

खडकवासला धरणालगत जलसंपदा विभागाच्या रिकाम्या जागेत पर्यटन केंद्र होणार आहे. हा सरकारचा पथदर्शी प्रकल्प असेल. येथील जागा बांधा, वापरा, हस्तांतरण तत्वावर देण्याचे नियोजन शासन स्तरावर सुरू आहे. या पार्श्वभूमीवर शनिवारी जलसंपदा मंत्री जयंत पाटील शनिवारी अचानक खडकवासला धरणाला भेट दिली.

जलसंपदा मंत्री जयंत पाटील यांनी धरण परिसराची पाहणी केली. हा प्रकल्प यशस्वी होण्यासाठी कशी परिस्थिती आहे. रिकामी पर्यटनाच्या दृष्टीने जागेचा कसा उपयोग करता येईल याची पाहणी यावेळी केली. त्यांच्यासमवेत कार्यकारी अभियंता विजय पाटील, उपअभियंता वामन भालेराव, राष्ट्रवादी काँग्रेसचे प्रदेश सरचिटणीस आनंद मते आदी उपस्थित होते.

जलसंपदा विभागाच्या मालकीची खडकवासला धरण परिसरात सुमारे 28 एकर जागा रिकामी पडून आहे. खासगी पार्टनरशिप करून या ठिकाणी पर्यटकांसाठी जलक्रीडा व पर्यटन केंद्र सुरू करता येईल. पर्यटनाच्या विविध सेवा- सुविधा उपलब्ध करून महसूल मिळविता येईल का याचा विचार सुरू आहे. अशी माहीती यावेळी उपस्थित असलेल्या अधिकार्यांनी दिली.

या रिकाम्या जागेचा विकास करून नागरिकांना सुविधा उपलब्ध करून देण्याचा सरकराचा हेतू असणार आहे. यामधून शासनाला महसूल देखील उपलब्ध होणार आहे. अशी माहीती पाटबंधारे विभागाचे मुख्य अभियंता राजेंद्र मोहिते यांनी दिली.