नांदेड फाटा कोरडे बागेतून जाणारा रस्ता बॅरिकेट लावून करण्यात आला बंद

नांदेडफटा परिसरात ५५ वर्षीय महिला आढळून आली करोना पॉझिटिव्ह

विशाल भालेराव
लॉकडाऊन टप्प्या टप्प्याने शिथिल करण्यात येत असतानाच सिंहगड रोडवरील नांदेड फाटा परिसरात कोरोनाचा शिरकाव झाला आहे. नांदेड फाटा परिसरातील जिजाई नगर, कोरडे बाग येथील एका ५५ वर्षीय महिलेचा अहवाल पॉझिटिव्ह आला आहे. एकही दिवस घराच्या बाहेर न पडलेल्या महिलेला कोरोनाची लागण झाली. ताप व श्वास घ्यायला त्रास जाणवत असल्याने सदर महिलेला तपासणीसाठी येथील नवले नवले हॉस्पिटलमध्ये दाखल करण्यात आले होते. तेथे या महिलेची कोरोना चाचणी केली असता शनिवारी रात्री सदर चाचणीचा अहवाल पॉझिटिव्ह आला अशी माहिती गटविकास अधिकारी प्रशांत शिर्के व तालुका आरोग्य अधिकारी डॉ. सचिन खरात यांच्याकडून देण्यात आली.

सदर महिलेच्या घरातील सहा व्यक्तींना तपासणीसाठी रुग्णालयात पाठवण्यात आले असून घरातील इतर पाच व्यक्तींना होम क्वारंटाईन करून ठेवण्यात आले असल्याचे खडकवासला प्राथमिक आरोग्य केंद्र अधिकारी डॉ. वंदना गवळी यांच्याकडून सांगण्यात आले.

नांदेड फाट्यावरील ज्या भागात रुग्ण आढळला आहे, येथील परिसर हवेली पोलिस स्टेशनचे पोलिस निरीक्षक अशोक शेळके यांनी ग्रामविकास अधिकारी नवनाथ झोळ व नितिश लगड यांच्या मदतीने सील केला आहे. याबाबत सिंहगड रोड पोलीस ठाण्याचे वरिष्ठ पोलीस निरीक्षक अशोक शेळके यांनी सांगितले की, या भागात महिला पॉझिटिव्ह आढळून आली असून नांदेडफाटा ते कोरडेबागेतून जाणार भाग बंद करण्यात आला आहे. लोकांना घरात थांबण्याच्या सूचना दिल्या जात आहेत. लोकांनी अफवांवर विश्वास ठेवू नये.

या परिसरामध्ये नांदेड ग्रामपंचायतीच्या वतीने युद्ध पातळीवर परिसर निर्जंतुकीकरण करण्याचे काम सुरू आहे.