"पैशाअभावी शिक्षण थांबणार नाही! – पुनीत बालन ग्रुपकडून पुण्यात ग्रंथालय व अभ्यासिकेची उभारणी"

पुणे, प्रतिनिधी: शहरातील गरीब व होतकरू विद्यार्थ्यांसाठी एक सुसज्ज आणि मोफत अभ्यासाचे केंद्र लवकरच उभे राहत आहे. ‘पुनीत बालन ग्रुप’तर्फे सौ. शोभा रसिकशेठ धारिवाल यांच्या स्मरणार्थ एक अत्याधुनिक अभ्यासिका व ग्रंथालय उभारले जाणार असून, त्याचे भूमिपूजन नुकतेच पुनीत बालन यांच्या हस्ते उत्साहात पार पडले.

समाजसेवेच्या दिशेने एक सकारात्मक पाऊल

राज्यातील आणि विशेषतः ग्रामीण भागातील विद्यार्थी शिक्षणाच्या उद्देशाने पुण्यात येतात. मात्र, शहरातील अभ्यासिका व ग्रंथालयांची फी त्यांच्या आवाक्याबाहेर असते. ही गरज लक्षात घेऊन, ‘पुनीत बालन ग्रुप’ने समाजिक बांधिलकीतून पुढाकार घेत, सर्व सुविधांनी युक्त अशी मोफत अभ्यासिका व ग्रंथालय उभारण्याचा निर्णय घेतला आहे. या अभ्यासिकेचे बांधकाम श्री वृद्धेश्वर-सिद्धेश्वर मंदिर देवस्थान ट्रस्टच्या मंदिर परिसरात होणार असून, ७,५०० चौरस फूट क्षेत्रफळाचे हे दोन मजली इमारतीचे स्वप्न लवकरच साकार होणार आहे.

‘‘विद्यार्थ्याची आर्थिक परिस्थिती गरीब असली तरी बौद्धिक परिस्थिती मात्र गरीब नसते. पुण्यात शिक्षणासाठी येणाऱ्या महाराष्ट्रातील दुर्गम भागातील गरजू विद्यार्थ्यांना या अभ्यासिका व ग्रंथालयात मोफत प्रवेश देण्यात येणार आहे. या विद्यार्थ्यांच्या शैक्षणिक प्रवासाच्या वाटेवर अभ्यासिका व ग्रंथालयाच्या माध्यमातून एक दिवा लावण्याची संधी आम्हाला मिळाली. यातूनच देशाची आणि समाजाची अधिक चांगली सेवा करणारे विद्यार्थी घडतील, असा विश्वास आहे.’’ पुनीत बालन (अध्यक्ष, पुनीत बालन ग्रुप)

मान्यवरांची उपस्थिती

या भूमिपूजन समारंभास पुनीत बालन (अध्यक्ष, पुनीत बालन ग्रुप) यांच्या प्रमुख उपस्थितीशिवाय, आर्किटेक्ट शिरीष केंभावी, ट्रस्टचे अध्यक्ष हनुमंतराव बहिरट-पाटील, सचिव सुधीर दुर्गे, खजिनदार शशिकांत भोसले, विश्वस्त संजय सातपुते आणि वृद्धेश्वर चौपाटीचे लाला गायकवाड आदी मान्यवर उपस्थित होते.

‘पुनीत बालन ग्रुप’चा सेवाभाव आणि कार्यक्षेत्र

पुनीत बालन ग्रुप हे केवळ व्यावसायिक क्षेत्रात नव्हे, तर शिक्षण, क्रीडा, वैद्यकीय सेवा, महिला सक्षमीकरण, पर्यावरण संवर्धन आणि अध्यात्मिक क्षेत्रातही आपले कार्य प्रभावीपणे पार पाडत आहे. पुण्यातून सुरू झालेली त्यांची सामाजिक कार्याची यात्रा आता थेट जम्मू-काश्मीरपर्यंत पोहोचली आहे.

शिक्षण हे केवळ ज्ञानाचेच नव्हे, तर समतेच्या दिशेने जाणारे प्रभावी माध्यम आहे, याची जाणीव ठेवून, हा सार्वजनिक अभ्यासिका प्रकल्प हा सामाजिक समावेशकतेचा एक उदाहरणीय उपक्रम ठरणार आहे.

आजच्या स्पर्धात्मक युगात दर्जेदार शिक्षण मिळवण्यासाठी शांत व सुसज्ज वातावरणाची गरज असते. गरजू विद्यार्थ्यांसाठी मोफत अभ्यासिकेची सुविधा उपलब्ध करून देणारा हा प्रकल्प, केवळ पुण्यासाठी नव्हे, तर संपूर्ण राज्यासाठी एक आदर्श सामाजिक उपक्रम ठरणार आहे. या अभ्यासिकेच्या उभारणीमुळे शेकडो विद्यार्थ्यांचे शैक्षणिक आयुष्य उजळून निघेल, यात शंका नाही.