गे डेटिंग अ‍ॅपचा घात: तरुणाला निर्वस्त्र करून धमकी, व्हिडीओच्या आधारे ऑनलाईन १० हजारांची लूट

 

पुणे: नांदेड सिटी परिसरात गे डेटिंग अ‍ॅप ‘गिन्डर’च्या माध्यमातून ओळख करून एका तरुणाला धमकावून जबरी चोरी करण्याची धक्कादायक घटना उघडकीस आली आहे. या प्रकरणात नांदेड सिटी पोलिसांनी एका आरोपीला अटक केली असून दुसरा आरोपी फरार आहे.

घटनेचा तपशील असा —

संभाजी कदम, पोलीस उपायुक्त (झोन ७) यांनी दिलेल्या माहितीनुसार, आरोपी रॉबिन उर्फ शुभम उपेंद्र कांबळे (वय २७, रा. गांदळफाटा, सिंहगड रोड, पुणे) याने पीडित तरुणाशी गिन्डर अ‍ॅपवरून ओळख वाढवली. त्यानंतर त्याला नांदेड सिटी गेटजवळील चूल आंगण हॉटेल परिसरात बोलावून घेतले.

त्यानंतर आरोपी व त्याचा साथीदार ओंकार मंडलिक (सध्या फरार) यांनी पीडिताला मारुती सुझुकी गाडीत बसवून प्राईड सिटी जवळील एका मोकळ्या जागेत नेले. तिथे पीडितावर अश्लील प्रकार करण्याचा प्रयत्न करण्यात आला. विरोध केल्यानंतर त्याला मारहाण करण्यात आली आणि जबरदस्तीने त्याचे कपडे उतरवून त्याचा व्हिडीओ रेकॉर्ड केला.

१० हजारांची ऑनलाईन लूट आणि जीवे मारण्याची धमकी

या व्हिडीओच्या माध्यमातून पीडिताच्या कुटुंबियांना पाठवून बदनामी करण्याची धमकी देत आरोपींनी त्याच्याकडे १० हजार रुपयांची मागणी केली. पीडिताने नकार दिल्यानंतर आरोपींनी त्याचा मोबाईल हिसकावला व त्यावरून गुगल पे व फोन पेच्या माध्यमातून १०,००० रुपये स्वतःच्या खात्यावर ट्रान्सफर करून घेतले. शिवाय, याविषयी कुणाला सांगितल्यास जीवे मारण्याची धमकी दिली.

पीडित तरुणाने नांदेड सिटी पोलीस ठाण्यात तक्रार दाखल केली असून या प्रकरणी पोलिसांनी गुन्हा दाखल करून रॉबिन कांबळे याला अटक केली आहे. दुसरा आरोपी ओंकार मंडलिक सध्या फरार असून त्याचा शोध सुरू आहे.